May person of interest na ang mga katapo sang Police Station 1 sa pagpangawat sa isa ka appliance center sa dalan Araneta, ciudad sang Bacolod pasado las 11 kagab-i, Marso 20.
Suno sa hepe sang Police Station 1, P/Major Elmer Bonilla sa interview sang DYHB, ginsulod ang Imperial Appliance Plaza, base sa ginpatigayon nga inventory sang mga empleyado nakuha sa ila ang kwarta nga kapin P37,000 nga petty cash kag wala naman sang may nadula nga appliances ukon kagamitan.
Santo sa kuha sang CCTV footage, nakita ang naga-isahanon nga suspetsado sa sulod sang establishemento pasado las 11 sang gab-i tubtob las 3 sang kaagahon.
Dugang ni PCapt. Bonilla, nahibaluan sang mga empleyado nga sila ang nakawatan bangod nga sa ila pagsulod las 8 kaina sang aga, Marso 21 nakita na lamang nila nga natumba na ang ginasudlan nila sang kwarta. Sa ocular investigation nga ginpatigayon, ang amo nga kawatan ang nag-agi sa atop sang fourth floor kun sa diin nahamtang ang stock room, kag siya ang nagpanaog sa first floor kag didto nakuha ang amo nga kwarta.
Narekober sa amo nga appliance center ang crowbar nga amo ang gingamit sa pagguba sang kandado sang ginabutangan sang kwarta. Padayon ang operation sang kapulisan sa posible nga pag-aresto sa amo nga suspetsado kag ini ang ginalantaw nga isa ka kilala nga kawatan.
