Ginakwestyon ni Governor Bong Lacson kun ngaa subong lang nagpahayag sang oposisyon ang Diocese of Dumaguete sa pagtukod sang Negros Island Region.
Suno sa gobernador, kuntani ginpalayag ang pagkontra sa NIR sadtong ginatalakay pa sa Kongreso ang layi nga naga-establisar sini. Nahibaluan nga sa isa ka interview, ginpabutyag ni Dumaguete Bishop Julio Cortes nga may mabaskog nga pagpamatok, lakip na sa mga lideres gikan sa nagkalain-lain nga sektor, sa pagtukod sang NIR kag dapat ginpalayag ini sang mga kongresista nga amo kuntani ang nagaserbe nga tingog sang mga pumuluyo.
Dugang pa sang Obispo nga magapaguwa sila sang isa ka statement. Suno kay Governor Lacson, wala ini nakahibalo angot sa igapaguwa nga statement sang Diocese apang nahibaluan naman nga mayoriya ang nagapabor sa pagtukod sang NIR.
Kumpiyansa man si Lacson nga makumbinser nanday Senate President Migz Zubiri kag Senator JV Ejercito si Presidente Bongbong Marcos nga pirmahan ang NIR bill.
