Magapasaka sang kaso nga murder ang pamilya sang ginluthang patay sa Barangay Hilub-ang banwa sang Calatrava sadtong Huwebes Santo, Marso 28, batok sa suspetsado.
Ang biktima ang ginkilala nga si Junnifer Pancho, 26-anyos, samtang ang suspetsado ginkilala nga si Ronjel Ugdiman, 28-anyos, lunsay mga mamumugon kag residente sang amo nga lugar.
Base sa pahayag ni Police Major Ronald Santillan, hepe sang Calatrava Municipal Police Station, ang biktima kag suspetsado ang nagpadulong sa isa ka birthday party sa ila lugar kun sa diin sila ang nagtambong sa pagsaot kag pag-inom sang makahulubog nga ilimnon.
Sa tunga sang ila pagtilipon-tipon, gingarit-garit ni Junnifer si Ronjel kun sa diin nagdesisyon nga magpauli na lng ang suspetsado, apang sa iya pagpapuli ginsundan ini siya sang biktima.
Santo sa panaysayon sang suspetsado sa mga kapulisan, ginluthang niya ang biktima bangod sa iya kakulba nga siya ang pagatandugon ukon paga-unahon sakiton sang biktima.
Amo nga nag-desisyon si Ronjel nga pagatiruhon si Junnifer sang makapila ka beses gamit ang ginapatihan .38 revolver, kun sa diin nagresulta sang kamatayon sang biktima.
Nagpalagyo pa ang suspetsado matapos ang insidente apang siya ang nagsurender sa mga kapulisan makaligad ang pila ka oras.
