Plano sang lokal nga panguluhan sang Bacolod kaupod ang Bacolod City Police Office (BCPO) nga magtukod sang isa ka taskforce nga magabantay sa mga nagapang-vandalize.
Ang City Ordinance 534 Series of 2011 ang nagadumili sang ano man nga sahi sang bandalismo sa ciudad kasubong man ang pag pagpatuman sang penalidad.
Sa interview sang DYHB sa author sang ini nga ordinansa nga nga si anay councilor kag karon spokesperson ni Mayor Albee Benitez nga si Atty. Caesar Distrito, iya ginpahayag nga ang ini nga City Ordinance ang tuyo nga mapapaskog pagid ang Anti-Vandalism Act kag mapasakaan gid sang kaso ang mga tawo nga responsable.
Sa karon, padayon ang paghinun-anon sang ciudad kag City Police sa diin ila man iga-tap ang mga barangay kapitan agud tapna-on ang mga naga-vandal diri sa ciudad ilabi na sa mga private property.
Kabahin sa ila inisyal nga solusyon amo ang pagpatukod sang expression/ freedom wall para sa ini nga mga ‘graffiti artist’ nga mahilig magsulat-sulat bisan diin lang.
Suno pa kay Distrito nga ang mga tawo nga kaangay sini ang nakakita sang kalipayan pinaagi sa pagbuhat sang ilegal nga butang amo kon ngaa, dapat mahatagan sila sang venue nga ila hilway nga ma express ang ila kaugalingon.
