Nakapili na sang tagapamuno kag mga miyembro sa igatukod nga Anti-vandalism taskforce ang Bacolod City Police Office (BCPO).
Sa interview sang DYHB kay City Director Colonel Noel Aliño, iya ginpahayag nga iya napilian si anay Police Station 4 Captain, Greeky Cayao nga magpanguna sa pagbantay sa mga pasaway nga nagapang higko sa mga ding-ding.
Dugang sini nga mangin miyembro ni Cayao ang intelligence unit sang 10 ka mga police stations sa ciudad kasubong man ang mga force multiplier.
Nagpanawagan man ni Aliño sa bulig sang pila ka mga ahensya sang gobyerno kaangay sang Department of Public Works and Highways (DPWH), Department of Social-Services (DSSD) kag Bacolod City Traffic Authority Office (BTAO) agud mas mapapaskog ang pagbantay sa mga nagapang-vandalize.
Paandam pa sang hepe nga iya gid pasabton ang mga tawo nga ila madakpan nagapang bandalismo. Agud madasig madakop ang mga may kahimuan sang pagpang bandalismo, magahatag sang P1K reward si Aliño sa kada tawo nga makatudlo kag identify sa mga responsable diri.
