Patay ang isa ka 43-anyos nga lalaki kag flock man sa KKKMJ poultry farm sa Purok Kalubihan, Brgy. Tabunan, Bago City, Negros Occidental, matapos gin-alegar ginkastigo sang iya mga upod sa trabaho. Ang biktima, tumandok sang South Cotabato, Mindanao.
Ang mga suspek ang naga-edad naman sang 43-anyos kag 25-anyos, lunsay lalaki kag pareho nga residente sang Brgy. Blumentritt, Murcia.
Santo sa report sang Bago City Police Station, ang biktima, nakit-an nga ginakastigo sang mga suspek sa guwa sang isa ka balay.
Suno sa saksi sa insidente, ang isa ka suspek may dala nga binangon kag nakit-an nga ginalapakan ang ulo sang biktima nga nagahayangon sa duta samtang ang isa ka suspek ang nagasumbag naman sa lawas sini.
Ang isa sa mga suspek ang nabatian pa nga naghambal nga ila balikan ang biktima kag utdan sang ulo. Matapos nakit-an ang biktima ini ang gindala sa Bago City Hospital, kag las-8:30 sang aga sang Abril 1 ini ang ginpaguwa man.
Apang mga las-9:45 sang gab-i sang Abril 2, nagbalik ini sa hospital bangud nagareklamo ini sang problema sa pagginhawa kag las-4 sang kaagahon naman sang Abril 3, 2024, ini ang ginbawian sang kabuhi.
Nag-request na ang Bago City Police Station sang autopsy sa lawas sang biktima. | DYHB News
