Incentives sa tag-iya sang establishment sa ila pader nga matinlo ginaduso; Freedom Wall plano man nga tukuron

Isa sa mga pamaagi nga nakita sang Sangguniang Panlungsod-Committee on Tourism agud ma mintinar ang katinluon sang mga pader sa ciudad amo ang pag incentivize sa mga tag-iya sang mga establisyemento.

Sa interview sang DYHB kay Councilor Jason Villarosa, SP Committee chair on Tourism, iya ginpahayag nga naga draft na siya sa karon sang ordinansa angut diri kag padayon man ang iya pagkonsulta sa City Accounting Office.

Kabahin sang ini nga plano amo ang pamando sa mga establisyemento nga pintahan kada duha ukon tatlo ka tuig ang ila mga pader agud malikawan kag matabunan ang mga kuris diri.

Sila ang iga-incentivize lang sang ciudad pinaagi sa paghatag deduction sa tax nga ila ginabayad.

Sa pihak nga bahin, maga butang man sang isa ka designated area ang ciudad agud pahamtangan sang freedom wall diin hilway nga maka pahayag sang ila art expression ang mga naga graffiti kag nagapang vandalize.