Ginkwestyon sang mga nagaplastar sang ila baligya kag sang Punong Barangay sang Brgy. Alijis ang pagpatigayon sang City Legal Office (CLO) sang clearing operation sa Carmen Avenue Regent Pearl Subdivision sa amo nga barangay, pasado las-4 sang hapon, adlaw sang Lunes, Abril 8.

Base sa interview sang DYHB kay Ma. Fe Fernandez, organizer sang pagpatigayon sang negosyo sa amo lugar, nga ila ginkatingala ang pagpatigayon sang clearing operation sang CLO sa lugar nga wala nag-koordinar sa mga opisyales sa barangay.

Suno kay Fernandez yara sa 18 out of 25 ka mga pwesto ang ginpang baklas sang CLO nga wala sila anay ginpatawag antes ang pagpangbaklas.

Sa bahin ni Punong Brgy. Donny Dela Vega, nga ila jurisdiction ang amo nga lugar kag sila ang indi na kinahanglanon nga magkuha sang permit sa ciudad antes magbaligya sa lugar. Bangod tuigan na ini nila nga aktibidad ilabi na kun nagahilapit ang Panaad Festival.

Dugang pa ni Dela Vega, natalana nga magabaligya ang amo nga mga negosyante sa Abril 15 tubtob Abril 21 apang naga amat-amat na sila pwesto agod makaplastar sang ila pwesto.

Aminado ang Punong Brgy. nga may pila ka mga pwesto ang naglapaw sa dalan apang panindugan sini nga indi ini rason nga indi mag koordinar ang CLO sa ila antes ang operasyon.

📷DYHB photos