Binulan na nga naga-agwanta sang yab-ok ang pila ka mga residente malapit sa construction sang isa ka proyekto sa Purok Villagracia, Brgy. Bata, Bacolod City.
Ang nasambit nga proyekto ang ginapanag-iyahan sang Megaworld samtang ang contractor sini ang Home World. Isa sa mga apektado nga residente amo si Wilfredo Rolando sang Brgy. Bata sa diin nagalaom ini nga may dugang nga tikang ang construction firm agod mapahagan-hagan ang perwisyo nga tuga sang yab-ok bangud sa paghakot sang balas kag pagkutkot sa lugar. Ini apisar nga naghatag na sang trapal ang construction firm agod itabon sa tagsa nila ka mga propiedad.
Indi lamang ang mga residente sang Brgy. Bata nga malapit sa construction site ang apektado sang yab-ok kundi mangin residente nga sakop sang Brgy. Mandalagan. Bangud sini, si Punong Barangay Paul Anieve sang Brgy. Mandalagan ang magapadala man sang sulat agod mapalab-ot ang reklamo sang mga apektado nga residente sa construction sang nasambit nga proyekto.
