Nagapanawagan sang hustisya ang grade 10 student nga biktima sang pagpanghimulos sang isa ka manunudlo sa ciudad sang Bacolod.
Base sa ekslusibo nga interview sang DYHB sa biktima, iya ginsaysay nga sadtong grade 9 student siya nagsugod ang ila nga komunikasyon.
Kung sa diin sa dalayon nila nga komunikasyon kag nangin aminado ang biktima nga siya ang na-attach sa amo nga manunudlo bangod siya ang ginatatap sa sulod sang buluthuan kag ginahatagan sang pagkaon.
Antes pa man mahulog ang buot sang biktima ginhambalan siya sang manunudlo nga “gusto ta ka, pero too young..”
Sadtong Hulyo 2023, siya ang ginhagad sang maestro nga sila ang magtambay. Sila ang nagkitaay sa isa ka fastfood chain sa ciudad agod mag drive thru.
Tapos sina, sila ang nagpadulong sa isa ka lodging house kung sa diin ginkatingala ini sang biktima.
Ginsaysay sang biktima nga antes pa man matabo ang pagpanghimulos, wala ini siya ginpapanaog sa salakyan samtang wala masira ang gate sang amo nga lodging house.
Sa ila pagsulod, didto na natabo ang paghimulos sang maestro sa biktima.
Gintingwaan sang biktima nga magpangindi apang siya ang ginhap-an sang maestro kag wala ini siya sang may mahimo.
Matapos ang insidente, padayon ang ila nga komunikasyon kag nanghagad pa ang maestro nga makighilawas sa biktima apang nagpangindi ini.
Sini nga Marso 2024 lamang nadiskubrihan sang pamilya ang amo nga natabo bangod nabukaran ang ila conversation nga duha.
Isa sa mga nakita sang pamilya among may insidente pa nga nangayo ining suspetsado sang litrato sa biktima nga naga-uba.
Gilayon nga nagpadulong sadtong Marso 18 sini nga tuig ang pamilya sang biktima agod ireport ang amo nga hitabo.
Apang sa bahin sang himata sang biktima ila gina kwestyon ang mahinay nga pagproseso sang kapulisan sa ila nga reklamo diin iya pa ginpahayag nga kaangay lang nga gina ‘pasa-pasahan’ lang sila.
Una nga nagreport ang ginikanan sang bata sa isa ka area sakop sang Police Station 7 diin gin request sila nga magpa medico legal kag magpa psychologist. Apang sang na tapos na sang ginikanan hikot ang ginrequest sang Police Station 7, ginrefer naman sila sini sa Police Station 2 bangud kay nahibaluan nga sa isa ka pension house sakop sang area natabo ang insidente.
Magluwas diri, nagreport naman ang pamilya sang biktima sa mismo eskwelahan apang imbes nga aksyunan ini, ginsaylo lang ang suspetsado sa division office kag karon padayon nga nagatrabaho didto.
Sa karon, disidido ang pamilya magpasaka kaso batok sa maestro.
