Nagapanawagan si Atty. Cesar Beloria sa buluthuan nga dapat tutukan kag hatagan sang nagakaigo nga assistance ang biktima nga ginaalegar ginhimuslan sang manunudlo sa isa ka eskwelahan sa ciudad sang Bacolod.
Sa interview sang DYHB kay Atty. Beloria ginsiling sini nga bangud imbolbado ang isa ka manunudlo sa amo nga insidente may yara sang revise rules ang Administrative case sa Department of Education tuhoy diri.
Ginsiling pa ni Atty. Beloria, duha ang posible nga mangin tikang sa pagpasaka sang Administrative Case. Ini ang kun ang complainant mismo ang maga-initiate nga mag-file ukon paagi sang motu proprio agud nga ma imbistigahan ini sang regional director.
Matapos sang mga Inisyal nga imbistigasyon,magapatigayon na gilayun sang formal investigation, sa diin diri magasulod ang duha ka posible nga pagahimuon sa suspetsado, kaangay sang preventive suspension bangud nasulod ini sa administrative case nga gross misconduct ukon ang ipaga-transfer ini agod mahilayo sa biktima pamaagi sa regional Office ukon sang DepEd.
Ang mga kaso nga pwedi mapasaka sa suspetsado amo ang Gross misconduct ukon Statutory rape bangud nga menor de edad pa ang estudyante sang nahitabo ang insidente.
Madumduman nga nagpadangat sa DYHB ang grade 10 student nga nagapanawagan sang hustisya sa ginaalegar pagpanghimulos sa iya sang isa ka manunudlo sadtong Hulyo 2023, sa ciudad sang Bacolod.
