Yara na sa karun sa isa ka shelter sa probinsya sang Negros Occidental ang 11-anyos nga babaye nga biktima sa pagpangastigo sang iya pamilya sa ciudad sang Talisay.
Suno sa pahayag ni Dionela Madrona ang head sang Talisay City Social Welfare and Development (CSWDO), naka-gwa na sa ospital ang bata sadtong Abril 10, apang padayon ang iya nga recovery bangod may pila pa ini nga kinahanglanon sa iya nga pag-ayo ukon may patigayunon pa nga medical intervention.
Yara man ang assistance sang CSWDO sa bata natuhoy sa pag-attend sini sang hearing kag pag-witness batok sa mga akusado.
Padayon man ang bulig pinansiyal sang Local Government Unit paagi kay Mayor Neil Lizares kag tiayon sini nga si Atty. Rowena Lizares paagi naman sa Angel’s Wings Foundation.
Natuhoy naman sa edukasyon, samtang yara ini sa shelter gina-paidalom ini sa therapeutic activity kaangay sang pag-color kag pag-drawing.
Dugang pa ni Madrona sa luyag naman nga magpalab-ot sang bulig sa bata, ipadangop lang sa opisina sang CSWDO kay sila na ang bahala nga ipalab-ot ini sa shelter kung sa diin ang bata sa karun.
