May yara na sang person of interest ang kapulisan sa pagpatay sang traysikol drayber nga taga-Isabela kag nasapwan sa Sitio Kangkong, San Agustine, Brgy. Bagroy, Binalbagan, las-8 sang aga, Abril 10, 2024.
Suno sa hepe sang Binalbagan Municipal Police Station, Police Major Randy Babor, ila na ginkuha ang kopya sang CCTV sa 7/11 store sa Isabela sa diin nakita ang apat ka mga suspek sa pagpatay sa biktima nga si Anthony Toledo, 43-anyos sang Brgy. 4, sa nasambit nga banwa.
Suno pa ka Babor, ila naman narekober ang traysikol sang biktima mismo didto sa banwa sang Isabela. Personal grudge ang isa sa ginalantaw sang Binalbagan MPS nga motibo sa pagpatay sa biktima.
Madumduman nga ang biktima ang nasapwan lamang sang isa ka biker nga nakalabay sa dalan matapos nabatian ang cellphone sini nga naga-alarm. | DYHB News
