PROVINCIAL CAPITOL – Labi pa nga nagdaku ang balor sang kahalitan nga tuga sang El Niño phenomenon sa sektor sang agrikultura sa probinsiya sang Negros Occidental.
Base sa Abril 12 nga report sang Office of the Provincial Agriculturist (OPA), yara na sa P173,576,405.61 ang balor sang kahalitan tuga sang malawig nga tig-ilinit kun sa diin P168,838,595.73 ang sa humay samtang P4,737,809.89 ang sa mais.
Tuman ang gindaku sini gikan sa P115.2 million nga reported cost of damage sadtong Abril 5 ukon isa ka semana lamang ang nakaligad.
Nagbalhag sang pinakadaku nga kahalitan sa humay ang banwa sang Cauayan nga nagdangat sa P67,889,229 kag nagapangaduha ang kaingod sini nga Kabankalan City nga may P41.9 million.
Sa mais, Calatrava ang may pinakadaku nga cost of damage nga yara sa P3.8 million.
