BACOLOD CITY- Gina-alegar ginkawatan ang isa sa mga stall sa Libertad Public Market sa bahin sang Barangay 33 ciudad sang Bacolod, Martes nga adlaw, Abril 16.
Base sa interview sang DYHB, kay Police Captain Dax Santillan, Station Commander sang Police Station 6 nga sa ila pagpangusisa sa nagapanag-iya sang amo nga balaligyaan nga las-4:15 sang kaagahon sa amo nga adlaw, ila na diskubrihan nga sila ang nakawatan bangod ang iya mga baligya ang nagnilapta na kag may nagkaladula.
Santo sa ginparekord sang biktima sa amo insidente, gintaban ang kapin P100,000 kag pila ka mga kagamitan.
Nagpatigayon sang ocular inspection ang mga kapulisan, kag ila nakita nga may buho ang atop kag kisame sang amo nga pwesto kag possible dira nag-agi ang mga gina-alegar kawatan.
May CCTV amo nga stall apang napatay ini sa tion nga nagluntad ang insidente.
Apang indi pa ma kompirmar sang mga kapulisan ang amo nga report bangod padayon pa ang ila imbestigasyon natuhoy diri kag pagpangita sang saksi sa amo nga hitabo.
