CADIZ CITY NEGROS OCCIDENTAL- Pila ka mga istruktura kag mga panimalay nga ginpangtukod sa propidad sang probisya sang Negros Occidental ipa-clearing sa Brgy. Celestino Villacin ciudad sang Cadiz.
Sa interview sang DYHB kay Cadiz City Mayor Salvador “Bading” Escalante, ginpahayag sini nga wala pa niya nabatun ang official letter gikan sa province government sa patigayunon nga demolition sa amo nga lugar.
Apang dugang pa ni Mayor Escalante, iya na ginpabalo ang mga barangay officials sa lugar nga ipa-clearing ang mga istruktura kag mga panimalay nga nahamtang sa lugar bangud illegal ang ila pagpuyo sa propidad.
Nahibaluan nga nagdamo ang mga residente sa lugar humalin sang nag-pandemic, sa diin nagsugud lamang ang mga ini sa mga payag apang karon may yara na sang istruktura nga natukod sa kabukiran.
Madumduman nga ang amo nga lugar ang kilala man bilang isa ka tourist attraction bangud sa Alimatok Waterfalls nga ginakadtuan sang mga tawo.
