Ginatinguhaan sa karon sang Central Negros Electric Cooperative (CENECO) nga makakuha na sang Provisional Authority (PA) halin sa Energy Regulatory Commission (ERC) para sa dugang nga 20 megawatts halin sa Energy Development Corporation (EDC).
Sa interview sang DYHB kay CENECO General Manager Atty. Arnel Lapore, iya ginpahayag nga kon ma-aksyunan sang ERC sini nga semana ang ila gina ayo nga pag issue sang PA.
Sini nga April 22 maga-online na ang EDC sa Cebu diin may 20 megawatts nga kontrata ang CENECO bilang bulos sa nadula nga pagsupply kuryente sang KEPCO.
Kon matigayon, posible magnubo man ang presyo sang kuryente sa merkado bangud kay geothermal ang ginakuhaan kuryente sang EDC.
Dugang pa, pahayag ni Lapore nga tani hatagan lang permiso sang ERC nga madeliver ang dugang nga kuryente bisan wala pa ma approve ang kontrata sang CENECO sa EDC.
Magapangayo man sang bulig ang CENECO sa National Electrification Administration para maga-appeal sa ERC agud makakuha sang “motion for issuance of PA.”
