Indi mag-deklarar sang state of calamity ang banwa sang Cauayan sa pihak nga ini ang may pinakadaku nga balor sang kahalitan tuga sang tig-ilinit sa probinsiya sang Negros Occidental.
Ini ang ginpahayag ni Mayor John Rey Tabujara paagi sa isa ka text message nga ginpadala sa mga katapo sang media, Byernes sang aga.
Sa pinakaulihi nga report sang Office of the Provincial Agriculturist, gikan sa kapin P184.7 million nga balor sang kahalitan sang tig-ilinit sa probinsiya, kapin P67.8 million ang sa cost of damage sa Cauayan.
Wala naman naghatag sang rason ang alkalde kun ngaa indi ini maghimo sang deklarasyon.
Nahibaluan nga una na nga ginpaidalom sa state of calamity ang banwa sang San Enrique kag kahapon, nagdeklarar man ang Kabankalan City.
