Wala gihapon nagakadulaan sang paglaum si 5th District Congressman Atty. Dino Yulo nga magapatigayon sang cloud seeding operation sa probinsiya sang Negros Occidental.
Ginpahayag ni Cong. Yulo sa DYHB nga nagahimo ini sang pila ka tikang agud maduso ang cloud seeding.
Isa na diri ang pagpakig-angot kay Department of Agrarian Reform Secretary Conrado Estrella, nga malapit nga abyan ni Agriculture Secretary Francisco Tiu Laurel.
Sang mag-abot si PBBM para managtag sang CLOA sa agrarian reform beneficiaries sa probinsiya sadtong Abril 8, nagpatawag sang presscon si Secretary Estrella kag ginkuha ini nga kahigayunan ni Cong. Yulo nga mangayu sang bulig para sa cloud seeding sa rason nga ang isa sa pinaka-apektado sang tuman nga tig-ilinit amo ang mga ARBs.
Sang amo man nga semana, nagpadulong si Yulo sa Metro Manila apang tyempo nga gindeklarar nga fiesta opisyal ang schedule sang appointment sini sa Bureau of Soils and Water Management.
Apang suno kay Yulo, indi ini mag-untat sa pagkumbinser sa BSWM nga may “seedable clouds” sa probinsiya, pamatuod sini ang mga gal-um kag pag-ulan sa Sur, nga amo ang may daku nga kahalitan tuga sang El Niño.
Suno kay Atty. Yulo, luyag lamang sini nga ihambal sang BSWM kun ano ang kinahanglanon bangud handa man ini nga magbulig.
