SPAIN – Isa ka babayi sa Spain ginkasuhan ang gobyerno matapos ini makabaton sang blood transfussion.
Tanan kita may nagkalain-lain nga ginapatihan base sa aton relihiyon.
Indi man ini pabor sa imo pagtu-o dapat, magpakita gid sang pagrespeto.
Ginreklamo sang isa ka Jehova’s witness ang gobyerno sang Spain sa European Court of Human Rights matapos ini ginpaidalum sa blood transfussion sa isa ka surgery bisan wala ini ginpanguyan sang permiso.
Si Rosa Mulla, isa ka Ecuadorian nga nagapuyo sa Spain ang nagaaleger biktima sang “ medical paternalism” bangud sa iya nationality nga relihiyon.
Sang 2018, nadumduman ni Rosa nga ginpafill-out ini sang dokumento para sa iya operasyon kag sigurado siya nga iya gid nabutang nga Jehova’s witness ini kag indi siya dapat mapaidalom sang blood transfussion.
Mapa red blood cells, white blood cells, platelets kag plasma man ini, dapat indi gid magsulod sa sistema ni Rosa.
Pila ka mga debate ang nagsiling nga dapat magpasalamat si Rosa sa mga tawo nga nagsalbar sang iya kabuhi labi na nga tigamatayon na ini kon tani bangud sang hemorrhage.
May iban naman nga nagasiling nga dapat, respetaron gid ang desisyon kag pagpati sang ini nga mga tawo.
