Indi magbakal ang Provincial Government sang eroplano para sa pagpatigayon sang cloud seeding operations sa Negros Occidental.
Ginpahayag ni Governor Bong Lacson nga indi eroplano ang problema kun ngaa wala nagapatigayon sang cloud seeding sa probinsiya bangud mismo ang mga eksperto ang nagasiling nga indi ini pwede nga himuon.
Dugang pa ni Lacson, kun kinahanglan, mahimo man nga mag-arkila sang eroplano para diri kaangay sang kinaandan nga ginahimo sang nagliligad nga tinuig.
Ginpabutyag sang gobernador nga tuman ka gastoso ang pag-angkon sang eroplano bangud kinahanglan sang daku nga kantidad para sa maintenance sini samtang ginalantaw nga madamo ang maga-request nga gamiton lamang ini sang libre.
Suno sa gobernador nga madugay na ginaduso ang pagbakal sang probinsiya sang eroplano kag helicopter apang masami man niya ini nga ginadis-ayrehan.
Samtang, ginpanindugan ni Lacson nga indi pa magdeklarar sang state of calamity sa bug-os nga probinsiya bangud may pundo pa nga sarang magamit sa paghatag sang ayuda sa apektado nga mga mangunguma.
