Natukiban sang Electric Cooperatives Audit Department sang National Electrification Administration (NEA ECAD) ang mga “improper disbursements” sang anay general manager kag mga katapo sang Board of Directors sang Negros Occidental Electric Cooperative (NOCECO).
Sa isa ka press conference nga ginpatawag sang NEA, Martes sang aga, ginbasa ni NEA Administrator Antonio Mariano Almeda ang kaundan sang report kun sa diin nasaad ang resulta sang ginpatigayon nga comprehensive operations audit sa NOCECO humalin Agusto 1, 2019 tubtob Abril 30, 2023.
Natukiban ang P20,128,907.28 nga gin-grant sang Board sa ila mga kaugalingon paagi sa nagkalain-lain nga allowances kag benefits.
Natukiban man nga nagbaton si anay NOCECO General Manager Jonas Discaya sang P20,128,907.28 nga ginalakipan sang indi angay nga pagtaas sa iya nga sweldo kag per diems, sobra nga gratuity pay, travel expenses kag iban pa nga benefits.
Si anay GM Engr. Ray Bustamante naman ang nagbaton sang kabug-usan nga P2,127,111 nga ginalakipan sang undue increase sa sweldo kag per diems, kag subong man unwarranted benefits. Siya ang una na nga gindagdagan sang 90-day preventive suspension sadtong Oktubre 2023.
Paathag sang NEA, makabig nga improper disbursements ang nasambit nga mga kantidad bangud lapaw ini sa gintalana nga thresholds sa idalom sang NEA Rules and Guidelines; wala sang nagakaigo nga approval gikan sa NEA; kag kapaslawan sa pagsumiter sang nagakaigo nga Board Resolutions nga gina-require sang NEA.
Bangud sini, sadtong Abril 18, ginpamatbatan sang NEA Board of Directors ang imbolbado nga NOCECO officials sang removal ukon pagka-kakas sa pwesto, pag-disqualify sa mga ini sa reinstatement ukon reemployment sa bisan ano nga electric cooperative kag indi naman sila sarang makapapili sa posisyon nga pagka-director sa bisan ano nga EC; kag pag-forfeit sang ila nga monetary benefits.
Ang desisyon ang igapasa sang NEA sa Department of Justice para sa possible pagpasaka sang nagakaigo nga kaso kriminal.
