BACOLOD CITY- Gindeklarar nga dead on arrival ang isa ka tricycle driver matapos nga siya ang ginluthang sa Deca Homes South Subdivision, Barangay Cabug ciudad sang Bacolod pasado las-4 sang hapon, Abril 25.
Ang biktima ginkilala nga si Teresito Gepelga, legal ang edad, kag residente sa amo nga lugar.
Base sa pahayag ni Police Captain Michael Tuburan, Station Commander sang Police Station 9, sa inisyal nga imbestigasyon sang kapulisan, samtang nagatambay si Gepelga sa iya tricycle, hinali lang may nabatian sang isa ka lupok ang mga residente malapit sa crime scene, kag ila nakita nga nagahigdaon na ang biktima.
May igo sa ulo tuga sang pagpangluthang ang biktima rason kun ngaa siya ang nagtaliwan kag posible close range ang pagtiro sa kay Gepelga
Nagapadayon naman ang pagpangusisa sang mga kapulisan natuhoy sa background sang biktima agod ma establisyar ang motibo sa pagpatay.
Padayon pa ang imbestigasyon sang mga kapulisan natuhoy sa insidente kag amo man ang pagtsekyar sang posible nga makuha nga CCTV footage sa lugar bangod wala naga-fuction ang CCTV sa entrance ukon exit sang amo nga subdivision.
