Nagpabutyag si Negros Occidental 6th District Congresswoman Mercedes Alvarez nga wala ini sang mahimo kun pakontrahan ini sang Partido Demokratiko Pilipino (PDP) sa maabot nga 2025 mid-term elections.
Ang pahayag ginhimo ni Alvarez matapos ginhingadlan sang local nga liderato sang PDP si anay Hinoba-an Mayor Ernesto Estrao nga posible padalaganon sa pagka-kongresista kontra sa iya.
Suno sa kongresista, derecho sang bisan sin-o man nga magpapili apang suno sa iya, tuman pa ka temprano nga estoryahan ang politika bangud sa madason nga tuig pa ang eleksyon.
Dugang pa sini, may mga PDP members sa Kamara kag Senado nga nakaupod sini sa trabaho kag nangin abyan naman sini.
Nagpamalibad naman si Alvarez sa pagkomento sa desisyon sang PDP kag suno sa iya, mas maayo kun ang partido na lang mismo ang pamangkuton.
Nahibaluan nga may duha pa ka termino nga nabilin si Alvarez.
