CALATRAVA- Pilason ang isa ka babaye matapos nga ginluthang sang iya nga bayaw kag mga kahinablosan sa Barangay Dolis banwa sang Calatrava, las-10 sang Domingo sang gab-i, Abril 27.
Ang biktima ang ginkilala nga si Emma Amolo, 57-anyos, mangunguma; samtang ang suspetsado nga bayaw sini amo si Wilson Amolo, 62-anyos, ang hinablos sang biktima ginkilala nanday Alec Amolo, 35-anyos, Junjun Amolo, 40-anyos, Albert Amolo, 27-anyos, Lary Boy Amolo, 43-anyos, Pepit Amolo, 25-anyos, kag himata sini nga si Tonio Pirisima, 57-anyos, kag lunsay mga residente sa amo nga lugar.
Base sa interview sang DYHB kay Police Captain Jesus Alba, Deputy Chief sang Calatrava Municipal Police Station, nga samtang nagapanweldo ang biktima sang iya mga empleyado, hinali nga ginkadtun ini siya sang mga suspetsado kag ginluthang.
Kun sa diin nakaagom ang biktima sang pilas sa bahin sang iya nga tiyan kag yara na sa karun sa estable nga kondisyon.
Nahibaluan nga sadtong tinalikdan nga semana nag-atubangay na ang pamilya Amolo sa Barangay bangod sa ila tima-tima natuhoy sa propedad.
Santo sa pagpangusisa sang kapulisan nga ang bana sang biktima ang nagbakal sang duta pinaagi sa bangko kun sa diin nalakip diri ang sa ila mga himata kun sa diin luyag na niya kuntani nga kuhaon ang dota nga nabakal agod ikultibar.
Apang indi luyag si Wilson nga ihatag ang amo nga dota amo nga nahimo ang krimen kaupod sang mga kahinablosan sang biktima.
Gilayon nga nagpalagyo ang mga suspetsado matapos ang insidente apang Domingo sang aga natigayon nga madakpan si Wilson, samtang ang pila pa ka mga suspetsado sa krimen ang padayon nga ginapangita sang mga kapulisan.
Dugang pa ni PCapt. Alba, desidido ang pamilya sang biktima nga magpasaka sang kaso nga frustrated murder batok sa mga suspetsado.
