WORLD NEWS -Nagpagwa sang isa ka panigbag-o nga video ang militante nga Hamas sang Sabado, Abril 27, kun sa diin ini ang nagapakita sang duha ka mga Israeli hostage sa Gaza Strip.
Ang amo nga video ang kaangay sa ginpagwa sa publiko sang Islamist group, nga ginkondenar man sang Israel bilang isa ka psychological terrorism.
Ang duha ka mga lalaki nga hostages, ginkilala nanday Keith Siegel, 64-anyos, kag Omri Miran, 47-anyos, makita sa video nga ang duha ang nagpahayag natuhoy sa ila pagpalangga sa ila tagsa ka mga pamilya kag nagalaom nga sila ang pahilwayon.
Si Siegel ang dual US citizen nga gin-hostage kaupod sang iya asawa, apang una na nga nahilway ang asawa sini sadtong Nobyemre 2023.
Samtang si Miran ang nahostage nagikan sa ila puluy-an sa Nahal Oz sa atubang sang iya asawa kag duha ka mga kabataan nga babaye sadtong Hamas killing spree nga nagpabaskog sang kinagamo sa Gaza.
Base sa datos sang Israel, yara sa kapin 250 ka mga Israeli kag mga pangayaw ang na-hostage sumugod ang pagpang-atake sang Hamas, nga nagpatay man sa kapin 1,200 ka mga indibidwal.
