SAGAY CITY- Ginpaidalom sa paraffin test ang katapo sang pamilya sang pulis nga upod sini sa balay sang ini napatay sa Prk. Eba, Brgy. Andres Bonifacio, ciudad sang Sagay sang Abril 27, 2024.
Suno kay Negros Occidental Police Provincial Office (NOCPPO) spokesperson Police Capt. Judesses Catalogo, magluwas sa live-in partner ni P/SSgt. Lernie Alacha, ginpaidalom man sa paraffin test ang 12-anyos nga ila adopted son kag ang 7-anyos nga Child in-conflict with the law (CICL).
Dugang pa ni Catalogo, ipaidalom man sa autopsy ang bangkay sang pulis. Samtang nagalaom si Catalogo nga indi makaapekto sa imbestigasyon ang pagbalik sang Department of Social Welfare and Development (DSWD) sa iloy sang kustodiya sa 7-anyos nga CICL.
Sa interview naman sang DYHB kay Atty. Cesar Beloria, ginpahayag sini nga dapat antes ginturn-over sang DSWD sa iloy ang 7-anyos ginpaagi ini sa proseso, kag kon mahimo kuntani ipalayo ini anay sa lugar sa diin natabo ang krimen bangud traumatic ini para sa iya.
Sa opinion naman ni Atty. Beloria sa paraffin test sa 7-anyos, dapat himuon ini agod pamatud-an nga indi siya guilty sa krimen. Apang kon himuon ang paraffin test sa 7-anyos agud tumuron nga siya ang naghimo sang krimen ukon suspek, indi ini mahimo suno kay Atty. Beloria bangud sa idalom sang juvenile justice law, wala sang criminal liability ang isa ka menor de edad.
