BACOLOD CITY- Ginluthang patay ang isa ka miyembro sang LGBTQ community, las-7:30 sang gab-i, Lunes nga adlaw, Abril 29, sa atubang mismo sang ila pwertahan sa bahin sang Prk. Boulevard Brgy. 14 ciudad sang Bacolod.
Ang biktima ginkilala nga si Babes Gonzales, 24-anyos, may live-in partner, kag residente sa amo nga lugar.
Base sa pahayag ni Police Major Elmer Bonilla, Station Commander sang Police Station 1, santo sa ila pagpangusisa sa iloy sang biktima, samtang ini ang nagalantaw sang telebisyon sa sulod sang ila balay, siya ang nakabati sang lupok, kag sa iya pagtamwa sa gwa sang ila balay, nakita niya si Babes nga yara sa atbang sang ila pwerta nga nagahapaon kag wala na sang kabuhi.
Sa inisyal may igo sa ulo ang biktima tuga sang pagpangluthang.
Matapos ang insidente, santo sa paglaragway sang iloy nakita niya ang isa ka dakuon nga lalaki nga nagasuksok sang bonnet, kag nagpalagyo nagikan sa west padulong east nga direksyon.
Narekober sa crime scene ang tatlo ka mga basiyo sang caliber .45 apang suno sa mga residente sila ang nakabati sang apat ka mga lupok sa lugar.
Padayon pa ang imbestigasyon sang mga kapulisan natuhoy sa insidente kag background sa amo nga biktima sa krimen.
