BINALBAGAN- Gin-ako sang New People’s Army (NPA) ang pagpatay sa isa ka mangunguma sa Sitio Cabalanti-an, Brgy. Amontay, Binalbagan, las-11 sang gab-i, Abril 28, 2024.
Ginkilala ang biktima nga si Samuel Pedro alyas Ritoy kag residente sang nasambit nga lugar. Nasapwan na lamang ang bangkay sang biktima kahapon sang aga sa ila nga gina-ulingan sa diin may igo ini sang armas dughan kag liog.
Gab-i sang insidente, ang utod sang biktima, nakabati sang tatlo ka mga lupok.
Sa statement sang Leonardo Panaligan Command-New People’s Army, ila ginsilutan sang kamatayon si alyas Ritoy bangud nga masupog ini nga informant sang military.
Suno pa sa NPA, nagapaniktik si Ritoy sa mga operasyon sang hublag kag nagaggiya sa mga operasyon sang Philippine National Police kag Armed Forces of the Philippines particular sa pwersa sang 94th kag 62nd IB sa mga boundary sang Isabela, kag Binalbagan sa Negros Occidental subong man sa Jimalalud kag La Libertad, Negros Oriental.
