BACOLOD CITY- Ginkabig sang Bacolod Police Station 6 nga nangin madinalag-on ang pagtukod sang Anti-Vandalism Taskforce sa ila area of responsibility.
Base sa interview sang DYHB kay Police Captain Dax Santillan, Station Commander sang amo nga estasyon nga sumugod nga ginpatindog ang taskforce sa ciudad sang Bacolod, nag untat na ang mga aktibidad sang mga persona nga nagapang-bandalismo sa mga pampubliko ukon pambribado nga establisyemento.
Wala sang may nadakpan ang mga katapo sang kapulisan sa area nga nagapang-bandalisno bangod ginapatihan nga mas nangin aware ang pumuluyo sa pagtutok sang otoridad sa pagbantay kontra bandalismo.
Dugang pa ni PCapt. Santillan, nga ang masami nga may bandalismo nga lugar sa ila nga area, amo ang mga pader sang buluthuan, kag gin-abandonar nga mga establisyemento antes pa man ang pagtukod sang taskforce.
