SIPALAY CITY- Ginhilway na ang driver sang van nga nakabunggo sa naga-angkasanay sa motorsiklo nga kapid nga mga lalaki sa Sitio Calat-an, Brgy. Canturay, Sipalay City pasado las-4 sang kaagahon, May 1, 2024.
Suno kay Police Lieutenant Colonel Fernando Sumblingo Jr., hepe sang Sipalay City Police Station, nag-aregluhanany na ang driver sang van kag ang pamilya sang mga biktima sa diin isa sa kapid ang ginbawian sang kabuhi nga ginkilala kay Jovan Ortega, 22-anyos.
Una naguwa sa imbestigasyon nga naga-usoy pa-norte ang motor nga dala sang call center agents nga biktima kag angkas sini. Samtang pa sur naman ang biyahe sang van.
Samtang nagabiyahe ang biktima, hinali lang may nagtabok nga ido amo kon ngaa ginlikawan niya ini. Apang sa iya pag likaw, nadulaan kontrol ang motorsiklo sini kag siya ang nagtabog sa pihak nga lane amo kon ngaa nagdasok kag natapakan ini sang pangulihi nga goma sang van.
Gintinguhaan pa nga madala ang biktima sa malapit nga ospital sa lugar apang gindeklara ini nga dead on arrival.
