BACOLOD CITY – Patay ang driver Isuzo truck matapos nga nahulog sa iya mismo ginamaneho nga salakyan.
Natabu aksidente pasado alas 3:40, Domingo sang kaagahon (Mayo 5) sa bahin sang Araneta Street, Purok Progreso, Barangay Sum-ag, syudad sang Bacolod.
Ang biktima ang ginkilala sa kay Alejandro Cartajena, residente sang Barangay 2, banwa sang Isabela.
Samtang, pilason naman ang helper nga si Rolly Carampatana, 33 anyus, residente sang Barangay Tinongan, sa banwa man sang Isabela.
Suno sa hepe sang Police Station 9, Police Captain Michael Tuburan nga base sa ila imbestigasyon, padulong sa sur nga bahin sang Bacolod ang Isuzo truck sa diin ila ginlikawan ang sugata nga motorsiklo, apang nawad-an naman sang control kag natumba ang truck matapos nga nakalab-ot sa indi sementado nga bahin sang dalan.
Paathag ni Tuburan nga bangud nga wala sang pwertahan ang truck, didto na kag nahulog ang driver nga si Cartajena nga gintun-anan naman sang iya kamatayon.
Ginahusisa sa karon sang Police Station 9 bangud nga magluwas sang impact sang paghulog sang driver sa dalan, nakabaton man sila sang impormasyon nga nalapakan sang nagasunod nga salakyan ang biktima rason nga napatay ini on the spot.
