BACOLOD CITY- Pilason ang isa ka lalaki nga may deperensiya sa paminsaron matapos nga ginluthang sang ila kaingod balay sa Purok Lubi, Barangay 3 ciudad sang Bacolod, pasado las-9, adlaw sang Lunes, Mayo 6.
Ang biktima ginkilala nga si Justine Morillo, 25-anyos, samtang ang suspetsado amo si Jerecho Paredes kag lunsay mga residente sa amo nga lugar.
Base sa interview sang DYHB kay Erlita Morillo, iloy sang biktima, antes ang insidente nagluntad, si Justine ang nagapamasura.
Samtang nagapamasura ang biktima, gina-alegar nga nagbaisay ang asawa sang suspetsado kag si Justine. Suno pa sa iloy, gina-alegar sang asawa ka suspetsado nga siya ang gintampa sang biktima apang ginpanginwala sang iloy nga nagapanakit ang iya bata.
Aminado si Erlita nga may deperensiya si Justine kag hinali lang naga-wakal kag naga-siyaget apang wala kuno ini nagapanakit. Nagpangayo naman sang pasaylo si Erlita sa mag-asawa sa natabo nga insidente kag iya ginlauman nga sila ang may paghangpanay na.
Apang samtang ang iloy sang biktima ang yara sa ila tupad balay, siya ang ginpabalo nga ang iya bata ang gintiro ni Jericho kag sa inisyal nga ihibalo ini ang naka agom sang pilas sa tiil kag kamot. Nagpalagyo pa ang suspetsado sa krimen apang makaligad ang pila ka minuto ini ang boluntaryo nga nag-surrender sa mga katapo sang kapulisan.
Yara naman sa karun sa ospital ang biktima para sa nagakaigo nga pagbulong.Padayon pa ang imbestigasyon sang Bacolod Police Station 2 natuhoy sa nagluntad nga insidente.
