BACOLOD CITY- Patay ang isa ka senior citizen matapos nga mabungguan sang depasahero nga jeep sa dalan Lacson sa bahin sang bangga Sto. Rosario Barangay Bata ciudad sang Bacolod, kapin las-2 sang kaagahon, adlaw sang Domingo, Mayo 5.
Ang biktima ang isa ka lalaki nga naga-edad 71-anyos, kag residente sang Barangay 13, samtang ang driver sang depasahero nga jeep nga may rota nga Handumana-Libertad ang naga-edad 50-anyos, kag residente sang Barangay Handumanan sa amo nga ciudad.
Base sa interview sang DYHB kay Police Captain Rondyll Tapang, Station Commander sang Police Station 3, samtang nagamaneho ang driver padulong norte kag maagi kuntani sa flyover, hinali nga nagdalagan ang biktima agod magtabok, apang wala ini siya makit-an sang driver amo nga siya ang nabungguan.
Sa pagpadulong sang mga rescuers sang Brgy. Mandalagan sa lugar, wala na sang pulso ang biktima. Bangod sa mabaskog nga impact sa pagkabunggo sa biktima, amo nga ginbawian ini sang kabuhi.
Dugang pa ni PCapt. Tapang, may inisyal nga settlement ang pamilya sang biktima kag ang driver.
