CAUAYAN-Ginpasakaan na kaso nga frustrated murder ang hacienda caretaker nga makaduha ka beses nga nagluthang sa isa ka mangunguma nga nagapaharab sang baka sa Brgy. Tiling, Cauayan sang Mayo 6, 2024.
Maswerte nga wala naglupok ang sulpak nga may bala nga 12-gauge shotgun sang ginluthang sang suspek nga si Cornelio Alejandro, 60-anyos sang Purok 2, ang biktima nga si Carlito Coladeros, 64, sang Purok 9.
Suno kay Police Captain Raffy Billones, Deputy Chief of Police Cauayan Police Station, nagapaharab lamang sang baka ang biktima sang ginpalapitan sang caretaker kag ginluthang apang wala naglupok ang sulpak. Nakadalagan ang biktima kag nakapangayo sang bulig sa iya nga pamilya.
