Indi tanan nga lugar sa Western Visayas ang naga-eksperyensiya sang panalagsahon nga pagtupa sang ulan.
Ginpahayag ni PAGASA Region 6 Weather Specialist 1 Ferdinand Rubin nga bangud yara na kita sa bulan sang Mayo, nagahilapit na ang tyempo sang tig-ululan rason nga malauman naman ang masami nga thunderstorms ukon pag-ulan.
Apang pagklaro ni Rubin nga nagapabilin nga makanay ang panahon sa bug-os nga Western Visayas kag ang nagatupa nga ulan ang dala sang localized thunderstorms.
Ginklaro sini dugang nga atrasado ang pagsugod sang tyempo tig-ululan sini nga tuig. Sa baylo sang kinanaandan nga sa katapusan sang Mayo ukon sa una nga bahin sang Hunyo, possible magasugod ini sa tunga-tunga ukon katapusan na nga bahin sang Hunyo.
Suno kay Rubin, ang pag-ulan sa karon ang ginalantaw nga makabulig sa pagpahagan-hagan sang mainit nga temperatura apang possible sa gihapon ang pagluntad sang mataas nga heat index.
