Patay ang isa ka lalaki matapos ini ginbuno sang iya mga nakaupod sa ilimnan pasado las 2 kaina sang kaagahon, Mayo 8 sa Zulueta Street, Brgy 4, Silay City.
Ang biktima ang ginkilala kay Ryan Flores, 21 anyos, single, wala ubra kag residente sang Purok Paghidaet, Brgy Mambulac, Silay.
Ang mga suspek naman ang ginkilala sanday Emilowe Delumpa, 29 years old isa ka factory worker kag Ricky Ogawa, 26, isa ka estudyante kag lunsay residente sang Employee Subdivision, Brgy. Mambulac sang nasiling nga ciudad.
Sandig sa inisyal nga imbestigasyon sang kapulisan, natukiban nga samtang nagasinadyahanay ang tatlo, hinali lang naglalisanay ang biktima kag si Ogawa kag nagtapungulay ang mga ini.
Nag inagaway pa sang sundang ang tatlo kag didto natalupangdan nga may tatlo na ka buno sa tiyan ang biktima.
Ginhingagaw pa dala sa Regional Hospital ang biktima apang gindeklarar ini nga Dead on Arrival.
Samtang ang duha naman ka mga suspetsado ang yara karon sa kustodiya sang Silay City Police Station.
