Patay ang isa ka pahinante samtang tatlo pilason matapos nga madulaan sang kontrol kag matumba ang isa ka fuso truck nga may karga sang 600 ka mga sako sang uling sa bahin sang Purok Cherry Blossoms, Brgy. Calumangan ciudad sang Bago, kapin las-3 sang kaagahon, Mayo 9.
Ang nagtaliwan ginkilala nga si Richienold Palmares, 44-anyos; samtang ang mga pahenante nga kaupdanan sang biktima amo sanday Ryan John Elite, 30-anyos; Adolfo Abiño, 43-anyos; Ronilo Menoy, 40-anyos; Mark Dela Cruz, 40-anyos; Aikent Elit, 31-anyos; kag naga-edad 17 anyos.
Ang driver naman sang Mitsubishi Fighter Truck amo si Rejem Sampani kag lunsay mga residente sang Barangay Inayauan banwa Cauayan.
Base sa interview sang DYHB kay Police Chief Master Sergeant Jeffrey Montinola, Traffic Investigator sang Bago PNP nagikan ang amo nga mga persona sa Bayawan, Negros Oriental kag magapadulong kuntani sa isa sa mga nagabaligya sang lechon manok sa Brgy. Alijis agod mag-deliver sang uling.
Santo imbestigasyon sang kapulisan, naglupok ang pang-ulihi nga goma sang truck amo nga nadulaan ini sang kontrol kag natumba.
Sa pagtumba sang truck napil-pilan si Palmares nga nagresulta sang iya kamatayon. Nahibaluan nga ang tatlo ka mga pahenante nalakip na ang nagtaliwan ang yara sa ibabaw sang ulo ka truck antes ang insidente.
Ginklaro sang mga pahenante ilabi na ang duha ka mga kaupodanan ni Palmares sa ibabaw sang truck nga sila ang bugtaw sang natabo ang insidente. Handa naman ang tag-iya sang truck kag ang driver sini nga mag-bayad sang danyos sa nangin biktima sang insidente.
