LA CASTELLANA- Gin-ako sang Leonardo Panaligan Command-New People’s Army (LPC-NPA) ang pagpatay sa 38-anyos nga lalaki sa Sitio Naube, Barangay Puso, La Castellana, Negros Occidental, las-7:30 sang gab-i, Mayo 9, 2024.
Ang biktima ang ginkilala nga si Armand Binalo-ac kag residente sang nasambit nga lugar. Ang biktima ang nakaangkon sang pilas sa ulo nga gintunaan sang kamatayon sini matapos nga ginluthang sa guwa sang ila puluy-an kagab-i. Sa statement nga ginpaguwa sang tagpamaba sang LPC-NPA nga si Ka JB Regalado, si Binalo-ac ang may kaso sa ila nga korte particular ang paghimulos sang iya himata sadtong 1998-1999.
Suno pa sa LPC-NPA, si Binalo-ac ang nagapangatubang sang two counts of attempted rape kag one count of rape sa ila nga korte gani ila ginpatuman ang silot nga kamatayon.
Samtang sa interview naman sang DYHB sa hepe sang La Castellana Municipal Police Station nga si Police Major Sherwin Fernandez, gin-ako sini nga nakalab-ot sa ila ang impormasyon nga mismo ang utod ni Binalo-ac ang nagreport diri sa NPA.
Ang nasambit nga utod, amo ang amay sang hinablos ni Binalo-ac nga ginapahayag iya ginhimuslan kag nagbunga pa.
