NEGROS OCCIDENTAL- Naghingyo na ang Commission on Human Rights (CHR) Negros Occidental sang dugang nga nga imbestigador gikan sa regional office para imbestigasyon sang serye sang pagpamatay sa probinsiya.
Suno kay Vincent Parra, head sang CHR Negros Occidental, nagahingyo ini sang augmentation gikan sa regioal office bangud indi masarangan sang duha lang ka imbestigador ang imbestigasyon nga ila ginlunsar.
Nahibaluan nga nagpatigayon sang motu propio investigation ang CHR-Bacolod sa ginaalegar paglikidar sang walo ka mga sibilyan humalin sadtong Abril tubtob sa una nga bahin sang Mayo, pito sa mga ini ang ginaalegar sang NPA nga espiya ukon military agents.
Sa madumduman, gin-aku sang Communist Terrorist Group ang pagpatay kanday Danny Boy Bartolome sang Sitio Paho, Camandag, La Castellana sadtong Abril 11; Alexander Alquizar, tanod sang Proper Lagaan, Calatrava sadtong Abril 20; Myrna Bilando sang Sitio Duga-anon, Barangay Oringao, Kabankalan City sadtong Abril 21; Jun Habagat sang Sitio Cagay, Barangay Camindangan, Sipalay City sadtong Abril 24; Albert “Tongkai” Golez sang Sitio Cuyawyaw, Barangay Inolingan, Moises Padilla sadtong Abril 24; Ritoy Pedro sang Sitio Kamanggahan, Barangay Amontay, Binalbagan sadtong Abril 28; kag barangay tanod nga si Donie Baculi sang Sitio Bactolon, Barangay Camindangan, Sipalay City sadtong Mayo 3.
Samtang nagapasalamat naman si Parra nga suportado sang Armed Forces of the Philippines (AFP) ang ila ginahimo nga imbestigasyon.
