BACOLOD CITY- Magapadayon sa pagbiyahe ang mga traditional jeepney sa ciudad sang Bacolod bisan sila ang ginkabig na nga colorum bangod unconsolidated ang ila prangkisa.
Base sa interview sang DYHB kay Rudy Catedral, presidente sang BACOD-MANIBELA, sila ang nagpatigayon sang untat-biyahe kahapon nga adlaw sang Huwebes bangod natapos na ang 15 diyas nga plaso nga ginhatag sang Land Transportation Franchising and Regulatory Board (LTFRB) VI nga sila ang maga-operate sa ciudad.
Yara sa kapin 800 ka mga units sang traditional jeepney ang nagtambong sang rally protesta kag pag-untat biyahe.
Magabalik na sila sang biyahe subong nga adlaw, apang suno kay Catedral kun may madakpan sa ila nga miyembro, sa gilayon sila tanan ang maga-untat biyahe kag igapahamtang kag ibalabag ang ila tagsa ka mga traditional jeepney sa talatapan sang Land Transportation Office (LTO).
Dugang pa ni Catedral, natalana sa Mayo 20 ang public hearing nga patigayunon sang Congress para sa mangin kapalaran sang nga unconsolidated traditional jeepney.
