Sin-o bala ang indi nanami-an mag outing kon summer? Ang season diin mangin memorable kon tani para sa isa ka pamilya, nagtuga man sang trahedya!
Patay ang isa ka iloy samtang naga-enjoy ini sa isa ka Holiday sa America matapos niya gin-ubos inom ang apat ka botelya sang tubig sa sulod sang 20 ka minutos.
Si Ashley Summers, 35 anyos, may duha ka mga kabataan ang naga bonding upod ang iya pamilya diin nag boating pa ang mga ini, sa idalom sang direkta nga init sang adlaw.
Ang tatlo ka adlaw nga bakasyon sang pamilya ang nangin mahilway lang apang sa ikaapat na nga adlaw, nabatyagan ni Ashley ang tuman nga kauhaw ukon dehydration.
Sa sulod sang 20 minutos, sunod-sunod nga gin-inom ni Ashley ang apat ka botelya sang tubig apang sang naubos niya ini, gilayon siya nakabatyag sang lingin sang ulo. Nagsalig ang bana ni Ashley nga normal lang ang nabatyagan sang iya asawa amo kun ngaa nagdesider na lang ang mga ini nga magpauli na.
Sa bilog nga biyahe, naga-uyat lang si Ashley sa iya ulo bangud sa ka lain sang pamatyag sini.
Sang nakalab-ot na ang mga ini sa ila balay, kag nagpanaog na si Ashley sa salakyan kag naglakat padulong sa balay, hinali lang ini nalipong. Inadlaw ang nakaligad, napatay si Ashley bangud sa water intoxication.
Base sa isa ka pagtuon, natukiban nga ang sobra-sobra nga fluid sa lawas ang makatuga sang water toxicity diin ginapahuyang sini ang sodium sa lawas sang tawo kag naga tuga sang swelling sa cells sini. Kon mapabay-an, magaresulta ini sa permanent brain damage.
