BAGO CITY- Patay ang 21-anyos nga lalaki matapos nga ginluthang sang ila kaingod balay kag iya man lng mismo nga abyan nga menor de edad sa Purok Kabatohan, Barangay Tabunan, ciudad sang Bago, kapin las-10 sang gab-i, adlaw sang Domingo, Mayo 19.
Ang biktima ginkilala nga si Rodemel Gantalao, soltero, samtang ang suspetsado ang 17-anyos nga lalaki, kag lunsay residente sa amo nga lugar.
Base sa interview sang DYHB kay Melanie Gantalo, iloy sang biktima, nga nagpadulong si Rodemel sa ila kaingod balay agod mag-angot sa peso wifi.
Pila ka minuto ang nakaligad nakabati na lang ini sila sang lupok, kag didto nabatian nga ginatawag na ang pangalan sang iya nga bata. Didto nakita na ni Melanie ang iya bata nga may igo sang bala ka armas luthang sa ulo. Ginhingagaw dala ang biktima sa ospital apang pila ka oras ang nakaligad, nadulaan na ini sang kabuhi.
Dugang pa sang iloy, wala ini sang ideya ukon nahibaluan nga wala sang pag-inchindihanay ang suspetsado kag ang iya bata bangod madugay na ini sila nga abyan. Santo naman sa pahayag ni Punong Brgy. Maria Mae Suarez sang amo nga Barangay, nga base sa ila pagpangusisa, nagsulod ang biktima sa balay sang suspect kaupod sang isa pa nila ka abyan nga menor agod nga luyag kuntani niya nga makita ang 38 revolver nga armas-luthang sang stepfather sang suspetsado.
Gilayon man ginkuha sang suspetsado ang armas, kag gina-alegar yamuhat nga gin-taya niya ini kay Rodemel, kag hinali ini naglupok kag naigo ang biktima.
Suno sa Punong Brgy. posible nga wala ideya ang suspetsado nga loaded sang bala ang amo nga armas luthang. Wala pa sa karun nadesisyunan sang pamilya ka biktima kun sila ang magafile sang kaso batok sa suspetsado.
Yara naman sa karun nahunong ang suspetsado sa Halfway Home sang Bago City Police Station para sa nagakaigo nga disposisyon.
