SILAY CITY- Patay ang isa ka amay samtang pilason naman ang bata sini kag isa pa ka lalaki sa pagmuno kag panglabo sa Hacienda Panaogao 2, Brgy. 4, Silay City, Negros Occidental, las-7 sang gab-i, Mayo 22, 2024.
Ginkilala ang napatay nga si Ciceron Bautista, 55-anyos, samtang ang pilason nga bata sini amo si Ronald, 31, kag ang isa pa ka lalaki nga si Andrew Mondragon, 25. Samtang ginkilala ang suspek nga si Meljun Mediane, 39.
Suno kay Lt. Colonel Mark Anthony Darroca, hepe sang Silay City Police Station, nagkadto ang mag-amay nga Bautista sa balay sang suspek agod husayan ang ila awayan sang nagligad nga inadlaw.
Ang suspek upod sini sa ila balay si Mondragon. Nagkumpruntahanay ang bata nga Bautista kag ang suspek sa diin ini ang ginbuno ni Mediane sang kutsilyo.
Nagtambag ang amay apang ini ang nabun-an man sa tiyan nga gintunaan sang iya kamatayon.
Si Mondragon ang nagbulig man tambag apang ini ang nabun-an man ni Mediane sa palad.
Apang ang bata nga Bautista nakakita sang espading kag ginlabo man sini si Mediane sa nawala nga kamot. Lunsay gindala naman sa Teresita Lopez Jalandoni Provincial Hospital ang suspek, si Ronald kag si Mondragon ang nangin outpatient naman.
Suno kay Darroca, ginpasakaan na sang kaso nga homicide kag frustrated homicide si Mediane.
