BACOLOD CITY- Kadungan sa pagbukas sang Bacolod Chicken Inasal Festival 2024 subong nga adlaw, Mayo 24, gin-anunsiyo sang ciudad nga gin-aprobahan na sang National Commission for Culture and the Arts (NCCA) nga mangin local cultural property ang chicken inasal sa ciudad sang Bacolod.
Base sa pahayag ni Mayor Albee Benitez, isa sa mga ginapabugal sang ciudad amo ang pinaka namit nga inasal sa bilog nga kalibutan.
Suno pa sa alkalde sa mga nakatilaw sang chicken inasal sa ciudad ang indi gid ma disappoint sa pagtilaw kag pagpadulong diri.
Madumduman ginduso ni Councilor Em Ang ang isa ka ordinansa nga naga-deklarar nga ang chicken inasal sa ciudad ang mangin cultural property, bangod nangin identity na ini sang ciudad kag ini ang masami ginapangita sa nagabisita kag nagapadulong sa Bacolod City.
