BACOLOD CITY- Patay ang isa ka pulis matapos nga ginluthang sang kapareho nga pulis sa isa ka subdivision sa bahin sang Barangay Tangub ciudad sang Bacolod, kapin las-5 sang hapon, Mayo 31.
Ang biktima ginkilala nga si Police Staff Sergeant Jotham Arrem Tuto, nga na-assign sa Bacolod City Police Office- Mobile Patrol Unit, 31-anyos, kasado, kag residente sang Crossing Agustin, Barangay Paraiso ciudad sang Sagay.
Ang suspetsado amo si Patrolman Alvin Rios nga na-assign naman sa Iloilo Provincial Police Office, 26-anyos ang edad, soltero, kag residente sang Barangay Bugnay, Valderama, Antique.
Base sa pahayag ni Police Major Eugene Tolentino, Station Commander sang Police Station 8, si Tuto ang yara sa puluy-an sang anay live-in partner ni Rios, kag antes pa ang pagpangluthang nagapahuway ang biktima sa kwarto kaupod ang live-in partner niya.
Nahibaluan nga si Rios kag anay live-in partner niya ang nagapanag-iya sang balay apang nagabisita lamang sa lugar ang suspetsado bangod may yara ini sila sang isa ka anom ka bulan nga lapsag.
Samtang nagapahuway ang biktima kaupod sang babaye sa kwarto, nag-abot ining si Rios kag iya nakita nga upuday sang anay live-in partner sa kwarto.
Ginapatihan nga bangod sa tuga sang selos, ginkuha ni Rios ang iya service firearm kag gintiro ang biktima sang makaduha ka beses nagresulta sang pagkapilas ni Tuto sa iya nga lawas. Ginhingagaw dala sa ospital si Tuto apang gindeklarar nga dead on arrival.
Narekober sa area ang isa ka caliber 9MM pistol, 2 ka basiyo, apat ka magazine nga may live ammunition. Samtang si Rios ang nahunong sa karun sa Bacolod City Police Station 8 para sa nagaka-igo nga disposisyon.
Ang anay live-in partner sang suspetsado ang yara man sa kustodiya sang kapulisan para sa dugang nga imbestigasyon. Padayon pa ang imbestigasyon sang kapulisan natuhoy sa nagluntad nga insidente.
