Bangud lang sang pag-ubo, gina-alegar nabali ang tul-an sang isa ka 35 anyos nga lalaki sa pungsod China.
Ang femur ang ginakonsiderar bilang pinakabakod nga tul-an sa lawas sang tawo apang sin-o bala ang magaha-um nga sa simple lang pag-ubo, mabali ini? Ang lalaki ang ginkilala kay Mr. Ye.
Ginpahayag sang isa ka doktor sa Department of Orthopedics nga ang mga kalalakinhan nga ka-edad ni Ye ang masami nagasuprer sang femur fracture resulta sang trauma kaangay sang car accidents ukon pagkahulog halin sa mataas nga lugar.
Suno kay Ye hinali lang siya nakabatyag sang tuman nga kasakit pagkatapos sang isa ka kusog nga pag-ubo kun sa diin abi pa niya simple lang ini nga cramps apang sang iya pagsugod tikang, nakabtyag ini sang kasakit sa iya balakang.
Ang X-ray ni Ye ang nagkompirma nga may femur fracture ini. Gilayon gin-imbestigaran sang mga doktor ang posible rason sang pagkabali sang femur ni Ye, gin-usisa ang iya lifestyle pati na ang iya mga ginakaon nga pagkaon.
Diri nagpatigayon man sila sang bone density test ukon pag-check kun ano kabakod ang iya tul-an.
Nadiskubrehan nga wala sang sakit sa tul-an si Ye apang ginpahayag sang mga ini nga gabok na ang iya tul-an bangud sa tuman nga pag-inom sang softdrinks kag kakulangon sang pag-ehersisyo.
Suno pa sa mga doktor nga mas damo ang gina inom nga softdrinks ni Ye kaysa sa tubig nga nagtuga naman sa kakulangon sang calcium sa iya nga lawas nga responsable tani sa pagpabakod sang iya nga tul-an.
