LA CASTELLANA- Gin-confirm sang DOST-PHIVOLCS, Kanlaon Observatory nga lahar ang nag-ilig sa mga busay, suba kag kadalanan sa Brgy. Biak na Bato, La Castellana kahapon sang hapon.
Sa interview sang DYHB kay Ptolemy Mañego, Science Research Assistant, DOST-Phivolcs, Kanlaon Observatory, La Granja, La Carlota City, ginpahayag sini nga na-check na sang ila team ang sa Purok Tamburong, Brgy. Biak na Bato kag na-confirm nga lahar.
Suno kay Maniego, ang lahar isa man ka mud flow nga may mga rocky debris kag pyroclastic materials.
Sa karon, nagapadayon ang degassing sang bulkan kag suno kay Mañego, normal nga may makita nga aso nga nagaguwa sa crater matapos ang phreatic eruption sadtong Lunes sang gab-i.
