BACOLOD CITY – Nagapanawagan si Bacolod City Mayor Albee Benitez sa mga nagpatay sa grade 11 student nga si Nicus Balagosa sa Barangay Granada nga magsungka na.
Sa statement ni Benitez, paagi sa spokesperson sini nga si Singcang Punong Barangay Atty. Caesar Distrito, nagpaandam man ini nga kun indi mag-surrender ang mga nagpatay kay Balagosa, magahulag ang bug-os nga pwersa sang kasuguan agud mahatagan sang hustisya ang kamatayon sang biktima.
Ginpanawagan man sang alkalde sa mga suspek sa ginaalegar pagpanghimulos nga magsungka na sa mga otoridad.
Sa madumduman, nagahampang sang billiards sa ila nga balay upod ang iya mga abyan si Balagosa, Domingo sang gab-I, sang hinali ini ginpalapitan sang duha ka armado nga mga kalalakin-an. Nakadalagan ang biktima apang ginlagas ini kag ginluthang sa sulod mismo sang ila balay.
Isa sa mga gunman ang gin-alegar amay sang menor de edad nga babayi nga biktima sang gang rape kun sa diin una gintudlo nga may kahimuan si Balagosa apang sang ulihi nahisayran nga wala ini sang kahilabtanan.
Ginpasiguro ni Benitez nga respetuhon ang kinamatarong sang mga suspek kag mahatagan sang kahigayunan nga depensahan ang ila kaugalingon sa korte.
Dugang pa ni Mayor Albee, “no matter what, no one has the right to take the life of another, and to put the law in his own hands. That ours is a government of laws and not of men, and therefore we should seek justice through our institution, and not in our means.”
