Nagabalor sang P6.4 million ang shabu nga nakumpiskar sang Police Regional Office (PRO) 6 sa sulod sang isa ka semana nga operasyon, Hunyo 1-7, 2024.
Nagabug-at sang 946 grams ang shabu nga nakumpiskar sang regional office sa nasambit nga petsa. Ini ang resulta sang 39 ka mga operasyon sa diin 55 naman ka mga suspek ang naaresto.
Ang Negros Occidental Police Provincial Office (NOCPPO) ang may pinakamadamo nga naaresto nga nagadangat sa 19, ginasundan sang Iloilo Provincial Police Office nga may 14; Iloilo City Police Office- 9; Regional Police Drug Enforcement Unit 6 (RPDEU6) -8; Bacolod City Police Office-3 kag isa naman sa Capiz Provincial Police Office.
